Варлам Міхайлавіч Кублашвілі нарадзіўся 15 мая 1923 г. у сяле Ахалдаба Тквібульскага раёна Грузінскай ССР у сям’і рабочага-шахцёра. Пасля заканчэння 7 класаў працаваў слесарам на шахце імя Сталіна ў г. Тквібулі. Прызваны ў Чырвоную армію 4 мая 1942 г., накіраваны ў пагранічныя войскі на Далёкім Усходзе. Служыў стралком заставы ў 69-й Ханкайскім пагранічным атрадзе.

Вясной 1944 г. Варлам Кублашвілі пераведзены на заходнюю граніцу — у 84-ы (Валкавыскі) пагранічны атрад НКУС Беларускай акругі. Вучыўся ў школе службовага сабакаводства. З’яўляўся інструктарам каманды службовых сабак, праяўляў пільнасць і знаходлівасць у пагранічных нарадах. Яго сабака быў адным з лепшых, браў нават даўнія сляды.